fimmtudagur, 23. maí 2019
 
TölublöðVenjuleg útgáfa

Tvö íslensku skipanna fengið á sig slæm brot

12. mars 2019 kl. 09:00

Venus NS, að loðnuveiðum. (Mynd: Ólafur Óskar Stefánsson)

Sex íslensk skip leituðu í var vegna brælu en sjólag er mjög slæmt á kolmunnamiðunum við Írland.

Sex íslensk uppsjávarveiðiskip leituðu í gær vars inni á Donegal flóa en óveður geisar nú á kolmunnamiðunum vestur af Írlandi. Að sögn Theódórs Þórðarsonar, skipstjóra á Venusi NS, er veðurútlit slæmt og ekki horfur á að óveðrið gangi niður fyrr en á föstudag.

Þetta kemur fram í frétt á heimasíðu HB Granda. þar segir jafnframt:

„Það er búið að vera leiðindaveður og það var bræla á miðunum þegar við komum. Þrátt fyrir það náðum við einu góðu holi, 440 tonnum, en það var mun minni afli í næsta holi á eftir. Eftir að veðrið versnaði var ekki um annað að ræða en leita vars og við komum inn á flóann í gær. Upphaflega ætluðum við til hafnar í Killybegs en þar var allt fullt og því leituðum við var inni á Donegal flóa. Í raun var ekki um annað að ræða því auk brælunnar er sjólag mjög slæmt þarna úti og tvö íslensku skipanna höfðu fengið slæm brot á sig,“ segir Theódór.

Að þessu sinni var Venus að veiðum töluvert norðar en kolmunnaveiðarnar byrjuðu á. Fiskurinn hrygnir suður og suðvestur af Írlandi og gengur svo norður í ætisleit.

„Við þekkjum lítið til veiða á kolunna á þessum tíma enda höfum við verið á loðnuveiðum í febrúar og fram í mars. Við höfum svo farið til kolmunnaveiða og undanfarin tvö ár hefur botninn dottið úr veiðunum vestur af Írlandi 18. til 20. mars. Vonandi verður breyting á í ár og við ættum að komast aftur á miðin á fimmtudagskvöld eða á föstudag,“ sagði Theódór.