mánudagur, 18. júní 2018
 
TölublöðVenjuleg útgáfa

Varðskip á leið til bjargar færeyskum togara

7. október 2008 kl. 18:17

Stjórnstöð Landhelgisgæslunnar barst á mánudagskvöld beiðni um aðstoð frá færeyska togaranum Rasmus Effersöe sem er vélarvana 9-10 sjómílur undan A- Grænlandi og um 550 sjómílur norður af Akureyri. Áætlað er að varðskipið dragi skipið til Akureyrar.

Varðskip Landhelgisgæslunnar var samstundis undirbúið fyrir brottför og hélt úr Reykjavíkurhöfn um klukkustund síðar eða kl. 00:50 og siglir nú áleiðis á staðinn.  Búist er við að varðskipið verði komið til bjargar um hádegi á fimmtudag. Að sögn skipverja er veður sem stendur gott á svæðinu, nokkur hafís en veðurspá góð.

Togarinn Rasmus Effersöe er 479 brúttólestir að stærð og 42,5 metra langur. Togarinn var á svæðinu til aðstoðar rússneska rannsóknaskipinu GEO ARCTIC og bíður rússneska skipið hjá togaranum eftir komu varðskipsins.

Umfangsmiklar loftslagsbreytingar hafa orðið  á síðastliðnum árum og hafa þær haft í för með sér aukna skipaumferð um hafísslóðir á Norður Atlantshafi.  Leitar- og björgunarsvæði Landhelgisgæslunnar er 1.800.000 ferkílómetrar en efnahagslögsagan er 754.000 ferkílómetrar og ber Landhelgisgæslan ábyrgð á öllum leitar og björgunaraðgerðum innan svæðisins..

Frá þessu er skýrt á vef Landhelgisgæslunnar.