miðvikudagur, 20. júní 2018
 
TölublöðVenjuleg útgáfa

Varðskipið Ægir dregur grænlenskan bát til Íslands

12. október 2009 kl. 11:41

Varðskip Landhelgisgæslunnar kom kl. 09:00 í morgun að grænlenska togbátnum  Qavak þar sem hann var vélarvana um 200 sjómílur suð-vestur af Reykjanesi með fjóra menn í áhöfn. Varðskipið er nú á leið til Íslands með bátinn í togi.

Báturinn var á leið til Danmerkur þegar vél hans bilaði í gærmorgun. Var þá send beiðni um aðstoð til stjórnstöðvar Landhelgisgæslunnar,  í gegnum flutningaskipið Naja Arctica sem kom Qavak til aðstoðar við bilunina. Var flutningaskipið um kyrrt  hjá togbátnum til kl. 07:00 í morgun eða þar til íslenska varðskipið kom á svæðið. Höfðu þá skipin rekið um 30 sjómílur í norð-vestur. Togskipið Qavak er um 200 tonn að þyngd og 22 metra langur, í eigu Polar Seafood á Grænlandi.

Að sögn skipherra á Ægi var dráttarlínu skotið yfir í Qavak kl. 09:17 í morgun og gekk aðgerðin vel. Áhöfn skipsins er í góðu ásigkomulagi, veður á svæðinu, 20-25 hnútar (12 m/sek)  talsverður sjór og 4-6 metra ölduhæð. Ágæt veðurspá er framundan en búist er við meðvindi á leið til Íslands. Ef áætlun stenst reiknar varðskipið með að koma til hafnar á Íslandi snemma á miðvikudagsmorgun, að því er segir í frétt frá Gæslunni.