sunnudagur, 21. október 2018
 
TölublöðVenjuleg útgáfa

Venus með fullfermi af loðnu

11. janúar 2018 kl. 09:17

Venus NS. (Mynd af vef HB Granda)

Aflinn nálægt um 2.800 tonn

Venus NS kom til heimahafnar á Vopnafirði um miðjan dag í gær með fullfermi af loðnu, að því er fram kemur á heimasíðu HB Granda. Loðnan fékkst í Langaneskantinum austanverðum og verður ekki annað sagt en að loðnuvertíðin fari vel af stað.

,,Við fórum frá Reykjavík að kvöldi 3. janúar og byrjuðum veiðar á Vestfjarðamiðum. Þar tókum við eitt kast með nót en fengum bara smáloðnu og því héldum við austur að Langanesi,“ segir Guðlaugur Jónsson skipstjóri en hann vonast til að aflinn sé um 2.800 tonn.

,,Við vorum þrjá sólarhringa á miðunum austan við Langanes og þótt lítið sæist og lóðningar væru óverulegar náðum við að fylla skipið í sjö holum. Það var verið að ljúka við að dæla aflanum í land og við förum aftur á miðin eftir nokkrar mínútur,“ sagði Guðlaugur er tal náðist af honum nú síðdegis í gær.

Víkingur AK er nú á loðnumiðunum fyrir austan en gert er ráð fyrir að skipið komi til hafnar á Vopnafirði í kvöld.