fimmtudagur, 14. desember 2017
 
TölublöðVenjuleg útgáfa

Vestmannaey og Bergey með þúsund tonn í júlí

11. ágúst 2017 kl. 13:36

Bergey VE að veiðum. Vestmannaeyjar í baksýn. Mynd/Birgir Þór Sverrisson

Júlímánuður var mun gjöfulli en sami mánuður í fyrra.

Vestmannaey VE og Bergey VE fiskuðu afar vel í júlímánuði, en samtals fengu skipin rúmlega eitt þúsund tonn í 21 veiðiferð í mánuðinum. 

Frá þessu segir á heimasíðu Síldarvinnslunnar, en nær allan mánuðinn voru skipin að veiðum vestur af landinu og var aflinn mestmegnis ýsa. Að auki veiddu skipin helst þorsk og karfa. Landað var í Vestmannaeyjum og á Grundarfirði. Er þetta mun betri afli en í júlímánuði í fyrra en þá fluttu skipin tvö um sjö hundruð tonn að landi.

Í fréttinni segir jafnframt frá því að afli skipanna fer víða. Ufsinn er unninn í Vestmannaeyjum, ýsan fer að drjúgum hluta til vinnslu á Dalvík og þorskurinn er unninn á Akureyri. Annars er aflinn fluttur út í gámum og fer í ríkum mæli til Englands en karfinn fer til Þýskalands.

Í byrjun júlímánaðar var tekið fjögurra sólarhringa helgarfrí vegna goslokahátíðar og sex sólarhringa þjóðhátíðarfrí um verslunarmannahelgina. 

Að sögn Arnars Richardssonar rekstrarstjóra héldu Eyjarnar tvær til veiða á mánudagskvöld og lönduðu góðum afla í gær, mestmegnis ýsu og karfa. Ýsan fékkst austur á Höfða en karfinn var tekinn við bæjardyr Eyjamanna, í Reynisdýpi og Háfadýp, segir í fréttinni.