sunnudagur, 26. maí 2019
 
TölublöðVenjuleg útgáfa

Vonast til að sjósetja Vestmannaey í fyrramálið

26. apríl 2019 kl. 12:00

Vestmannaey og Bergey eru búin tveimur aðalvélum og tveimur skrúfum. Mynd/Guðmundur Alfreðsson

Smíði systurskipanna Vestmannaeyjar og Bergeyjar gengur vel.

Hin nýja Vestmannaey var tekin út úr húsi í morgun, nýmáluð og fín, segir í færslu á heimasíðu Síldarvinnslunnar. 

Skipið er smíðað í skipasmíðastöð Vard í Aukra í Noregi. Notaður er vagn til að færa skipið út úr húsinu og mun hann flytja það út á pramma. Pramminn verður síðan dreginn út og fjörð og þar verður honum sökkt undan skipinu. Gert er ráð fyrir að Vestmannaey muni fljóta í fyrramálið.

Guðmundur Alfreðsson, útgerðarstjóri Bergs-Hugins, er í Aukra og fylgist grannt með. Hann segir að mönnum lítist afar vel á Vestmannaey og brosi allan hringinn. Þá segir hann að gert sé ráð fyrir að vélar skipsins verði gangsettar 4. eða 5. maí.

Systurskip Vestmannaeyjar, Bergey, er einnig í smíðum í Aukra og er ráðgert að það verði sjósett í ágúst nk. Skipin eru tæplega 29 metrar að lengd og 12 metra breið og há. Sumir segja að þessi skip séu stór-lítil, segir í niðurlagi fréttarinnar.