föstudagur, 17. september 2021
 
TölublöðVenjuleg útgáfa

30 tonn eftir þrettán tíma tog

24. maí 2013 kl. 12:32

Barði NK 120

Aflinn á úthafskarfamiðunum meiri en frystitækin um borð anna.

Frystitogarinn Barði NK hélt til úthafskarfaveiða á Reykjaneshrygg hinn 8. maí sl. og hefur skipið aflað mjög vel. Barði hélt til Hafnarfjarðar og millilandaði þar tæplega 7900 kössum eða 166 tonnum af frystum afurðum um síðustu helgi. Að löndun lokinni hélt hann strax aftur á miðin og er væntanlegur til Neskaupstaðar fyrir sjómannadag eða þegar lokið verður við að veiða kvóta skipsins.

Bjarni Ólafur Hjálmarsson skipstjóri lætur afar vel af úthafskarfaveiðinni í samtali á vef Síldarvinnslunnar. Hann segir að þeir á Barða séu yfirleitt að fá um 30 tonn eftir 13 tíma hol og það þýði að frystitækin um borð séu fullnýtt og allt gangi eins og í sögu. Eftir hvert hol þarf skipið að bíða í alllangan tíma til að geta togað á ný en mikill fjöldi skipa er á miðunum og raða þau sér upp og toga hvert á eftir öðru á veiðisvæðinu.