þriðjudagur, 22. júní 2021
 
TölublöðVenjuleg útgáfa

50.000 tonn óveidd af makrílkvóta Færeyja

19. september 2012 kl. 11:42

Færeyska skipið Finnur Fríði í íslenskri höfn (Mynd: Óðinn Magnason)

Makríllinn er á leiðinni út úr lögsögu þeirra.

Færeyinga er ennþá óveidd um 50.000 tonn af makrílkvóta sínum. Makríllinn er nú að synda út úr lögsögu þeirra og færeysk skip hafa ekki leyfi til að elta hann inn í lögsögur ESB eða Noregs vegna makríldeilunnar, að því er fram kemur á vef færeyska útvarpsins í dag.  

Færeyski kvótinn er 148.000 tonn í ár, þar af fá Rússar 13.000 tonn í gagnkvæmum skiptum á veiðiheimildum. Miðað við þann kvóta sem kemur í hlut Færeyinga sjálfra vantar ennþá 37% upp á að honum sé náð. 

Færeysku nótaskipin sex, sem stundað hafa makrílveiðar í sumar, fengu úthlutað 55.000 tonna kvóta og er útlit fyrir að þau klári hann, en þau hafa leyfi til að geyma 10% kvótans til næsta árs ef svo verkast vill. Skip í öðrum útgerðarflokkum hafa hvergi náð að veiða þann kvóta sem þeim var ætlaður.