fimmtudagur, 19. september 2019
 
TölublöðVenjuleg útgáfa

900 milljónir í markaðssetningu á sjávarafurðum innanlands

20. september 2011 kl. 09:11

Sushi

Auglýsa fisk fyrir sushi, hversdagsmat og veisluborðið

Norðmenn ætla að verja 42 milljónum norskra króna (um 900 milljónum ISK) í markaðssetningu á sjávarafurðum innanlands. Um er að ræða þrjár mismunandi herferðir á vegum norska útflutningsráðsins til að auka sölu á fiski í sushi, hversdagsmat og jólamat. Vakin verður athygli á norskum sjávarafurðum með auglýsingum í sjónvarpi, prentmiðlum og á netinu.

Nú í september ætlar útflutningsráðið að beina sjónum sínum að sushi. Norðmenn keyptu rúmlega tvöfalt meira af sushi í fyrra en árið 2005. Útflutningsráðið ætlar að nýta sér þennan meðbyr með því að útvíkka sushineyslu Norðmanna, sem hingað til hefur aðallega farið fram í veitingahúsum, yfir í eldhús heimilanna.

Útflutningsráðið sér einnig vaxtarmöguleika með því að hvetja Norðmenn til að hafa fisk oftar á kvöldverðarborðinu heima. Spjótunum verður einkum beint að barnafjölskyldum og ungu sambýlisfólki. Ætlunin er að fræða þennan hóp um einfalda og spennandi fiskrétti.

­Þriðja markaðsherferðin verður um jólahátíðina. Þá hittast vinir og ættingjar og setjast saman að veisluborðinu. Auglýstir verða girnilegir sjávarréttir sem hæfa þessu tilefni.