þriðjudagur, 22. júní 2021
 
TölublöðVenjuleg útgáfa

Aðeins 19 smábátar hafa landað makríl

11. ágúst 2015 kl. 13:48

Makrílbátur á handfæraveiðum. (Mynd: Jón Páll Ásgeirsson).

Aflinn alls 191 samanborið við 3.032 tonn á sama tíma í fyrra.

Aðeins 19 smábátar hafa landað afla það sem af er þessari vertíð og alls 191 tonni.  Aflahæstur er Brynja II SH 237 með 32 tonn, en á sama tíma í fyrra var afli Brynju kominn í 106 tonn.

Þegar horft er til síðasta árs höfðu 104 bátar hafið veiðar 10. ágúst og voru þeir búnir að landa alls 3.032 tonnum.   

Þetta kemur fram á vef LS. Þar segir ennfremur:

„Stærsta áhyggjuefnið nú eru markaðsmálin.  Færri hafa sýnt áhuga á að kaupa væntanlegan afla vegna gríðarlegrar óvissu á mörkuðum. Hins vegar - sem menn telja léttvægara - að makríllinn virðist ekki koma í eins miklu magni upp að ströndinni og verið hefur.   

Það er aftur á móti jákvætt að makríllinn nú er mun stærri en áður hefur sést á þessum tíma sem ætti að hjálpa til við sölu aflans.

Að sögn væntanlegra kaupenda á makríl leggja þeir allt kapp á að ná sölusamningum og eru alls ekki úrkula vonar um slíkt náist innan tíðar.“

Alls er nú búið að veiða 75 þús. tonn af makríl hér við land sem er 11 þúsund tonnum minna en á sama tíma í fyrra.