laugardagur, 21. september 2019
 
TölublöðVenjuleg útgáfa

Aflaverðmæti dróst saman um 5 milljarða

19. desember 2013 kl. 11:52

Botnfiskurinn lækkaði í verðmæti en uppsjávarfiskurinn stóð nokkurn veginn í stað.

Aflaverðmæti íslenskra skipa nam 117 milljörðum króna á fyrstu níu mánuðum ársins 2013 samanborið við 123 milljarða á sama tímabili 2012. Aflaverðmæti hefur því dregist saman um tæplega 5,7 milljarða króna eða 4,6% á milli ára.

Aflaverðmæti botnfisks var rúmlega 67 milljarðar króna og dróst saman um 6,2% miðað við sama tímabil í fyrra. Verðmæti þorskafla var um 34 milljarðar og dróst saman um 8,1% frá fyrra ári. Aflaverðmæti ýsu nam 8,4 milljörðum og dróst saman um 9,4% en verðmæti karfaaflans nam rúmum 10,2 milljörðum, sem er 0,9% samdráttur frá fyrstu níu mánuðum ársins 2012.

Verðmæti úthafskarfa nam 2,1 milljarði króna á fyrstu níu mánuðum ársins og jókst um 8% miðað við sama tímabil í fyrra. Verðmæti ufsaaflans jókst um 6% milli ára og nam rúmum 7,4 milljörðum króna í janúar til september 2013.

Verðmæti uppsjávarafla nam rúmum 38 milljörðum króna í janúar til september 2013, sem er um 0,4% aukning frá fyrra ári. Aflaverðmæti loðnu nam 15,6 milljörðum króna á fyrstu níu mánuðum ársins sem er 19,2% aukning miðað við sama tímabil í fyrra. Aflaverðmæti kolmunna jókst um 10,4% frá fyrra ári og var rúmlega 2,9 milljarðar króna í janúar til september 2013.

Aflaverðmæti síldar dróst saman um 35,5% milli ára og var rúmlega 4,1 milljarður króna í janúar til september 2013. Aflaverðmæti makríls var um 14,8 milljarðar króna á fyrstu níu mánuðum ársins sem er 2,8% aukning miðað við sama tímabil í fyrra. Aflaverðmæti flatfisksafla nam rúmum 7,6 milljörðum króna, sem er 11,4% samdráttur frá janúar til september 2012.

Sjá nánar á vef Hagstofunnar.