mánudagur, 30. nóvember 2020
 
TölublöðVenjuleg útgáfa

Aflaverðmæti dróst saman um milljarð

22. ágúst 2011 kl. 09:08

Fiskur

Íslensk skip fiskuðu fyrir 57 milljarða á fyrstu fimm mánuðum ársins.

Aflaverðmæti fiskiskipaflotans nam 57 milljörðum króna frá áramótum til maíloka í ár sem er númum milljarði minna en á sama tíma í fyrra. Samdrátturinn nemur 1,8% á milli ára. Verðmæti botnfiskaflans minnkaði en verðmæti uppsjávaraflans jókst.

Aflaverðmæti botnfisks var í lok maí orðið 39,1 milljarður og dróst saman um 10,2% frá sama tíma í fyrra þegar aflaverðmætið nam 43,5 milljörðum króna. Verðmæti þorskafla var um 21,6 milljarðar og dróst saman um 2,4% frá fyrra ári. Aflaverðmæti ýsu nam 5,6 milljörðum og dróst saman um 25,8%, en verðmæti karfaaflans nam 5,1 milljarði, sem er 12,4% samdráttur frá fyrstu fimm mánuðum ársins 2010. Verðmæti ufsaaflans jókst um 11,4% milli ára í tæpa 3 milljarða.

Verðmæti flatfiskafla nam tæpum 4,9 milljörðum króna í janúar til maí 2011, sem er 17% aukning frá fyrra ári.

Aflaverðmæti uppsjávarafla jókst um 21,4% milli ára og nam tæpum 10,9 milljörðum. Má rekja þá verðmætaaukningu til aukins loðnuafla. Verðmæti hans nam 8,7 milljörðum króna og jókst um 248% milli ára.
 
Verðmæti afla sem seldur er í beinni sölu útgerða til vinnslu innanlands nam 28,8 milljörðum króna og jókst um 14,3% frá árinu 2010. Aflaverðmæti sjófrystingar voru tæpir 15,6 milljarðar sem er 11,4% samdráttur milli ára. Verðmæti afla sem keyptur er á markaði til vinnslu innanlands dróst saman um 5,7% milli ára og var um 9 milljarðar króna.

Nánar á vef Hagstofu Íslands.