föstudagur, 18. júní 2021
 
TölublöðVenjuleg útgáfa

Aflaverðmæti eykst um 10 milljarða

25. september 2012 kl. 09:46

Verðmæti uppsjávarafla jókst um 38% á fyrri hluta ársins

Aflaverðmæti íslenskra skipa nam 80,5 milljörðum króna á fyrri hluta ársins 2012 samanborið við 70,5 milljarða á sama tímabili 2011. Aflaverðmæti hefur því aukist um 10 milljarða eða 14,2% á milli ára, að því er fram kemur í frétt frá Hagstofu Íslands.

Aflaverðmæti botnfisks var 52,2 milljarðar og jókst um 8% frá sama tíma í fyrra þegar aflaverðmætið nam 48,4 milljörðum. Verðmæti þorskafla var um 27,2 milljarðar og jókst um 12,9% frá fyrra ári. Aflaverðmæti ýsu nam 7,4 milljörðum og jókst um 19,4% en verðmæti karfaaflans nam 7,7 milljörðum, sem er 21,4% aukning frá fyrstu sex mánuðum ársins 2011. Verðmæti ufsaaflans jókst um 6,1% milli ára og nam 4,1 milljarði króna í janúar til júní 2012.

Verðmæti uppsjávarafla nam um 18,5 milljörðum króna í janúar til júní 2012, sem er 37,6% aukning frá fyrra ári. Sú aukning skýrist að mestu af loðnuafla að verðmæti rúmum13 milljörðum króna samanborið við 8,7 milljarða á fyrri hluta ársins 2011. Einnig var 1,6 milljarða króna aukning í kolmunnaafla, sem nam um 2,5 milljörðum króna árið 2012. Aflaverðmæti flatfisksafla nam um 6,3 milljörðum króna, sem er 9,1% aukning frá janúar til júní 2011.