fimmtudagur, 24. júní 2021
 
TölublöðVenjuleg útgáfa

Aflaverðmæti jókst um 26% milli ára

19. júní 2012 kl. 09:23

Fiski landað á Snæfellsnesi. (Mynd: Alfons Finnsson).

Íslensk skip fiskuðu fyrir 47 milljarða króna frá áramótum til marsloka.

Aflaverðmæti íslenskra skipa nam 47,3 milljörðum króna á fyrstu þremur mánuðum ársins 2012 samanborið við 37,6 milljarða á sama tímabili 2011. Aflaverðmæti hefur því aukist um 9,7 milljarða eða 25,8% á milli ára.

Aflaverðmæti botnfisks var 29 milljarðar og jókst um 24,2% frá sama tíma í fyrra þegar aflaverðmætið nam 23,3 milljörðum. Verðmæti þorskafla var um 16,1 milljarður og jókst um 17,6% frá fyrra ári. Aflaverðmæti ýsu nam 4,5 milljörðum og jókst um 32,3% en verðmæti karfaaflans nam 4,8 milljörðum, sem er 70% aukning frá fyrstu þremur mánuðum ársins 2011. Verðmæti ufsaaflans jókst um 38,1% milli ára og nam 1,7 milljörðum króna í janúar til mars 2012.

Verðmæti uppsjávarafla nam um 14,7 milljörðum króna í janúar til mars 2012, sem er um 35% aukning frá fyrra ári. Sú aukning skýrist að mestu af loðnuafla að verðmæti 13 milljörðum króna samanborið við 8,7 milljarða á fyrstu þremur mánuðum ársins 2011. Aflaverðmæti flatfisksafla nam um 3 milljörðum króna, sem er 4,3% aukning frá janúar til mars 2011.

Sjá nánar á vef Hagstofu Íslands.