miðvikudagur, 21. ágúst 2019
 
TölublöðVenjuleg útgáfa

Aflaverðmæti jókst um rúm 15% frá fyrra ári

14. ágúst 2019 kl. 10:30

Mynd/Hagstofa Íslands

Aflaverðmæti botnfiskafla nam tæpum 91 milljarði króna árið 2018 og jókst um 17,9% frá fyrra ári.

Landaður afli íslenskra skipa árið 2018 var tæplega 1.259 þúsund tonn, sem er 79.000 tonnum, eða tæplega 7% meira en árið 2017. Aflaverðmæti ársins var tæplega 128 milljarðar króna, sem er 15,6% aukning miðað við 2017.

Þetta kemur fram í frétt Hagstofu Íslands.

Alls veiddust rúmlega 480.000 tonn af botnfiski sem er 51.000 tonnum meira en árið 2017. Aflaverðmæti botnfiskafla nam tæpum 91 milljarði króna árið 2018 og jókst um 17,9% frá fyrra ári. Þorskur er sem fyrr verðmætasta fisktegundin með aflaverðmæti upp á rúma 57 milljarða króna.

Í tonnum talið veiddist mest magn af uppsjávarfiski, en árið 2018 veiddust tæplega 739.000 tonn, eða 20.500 tonnum meira en árið 2017. Mest veiddist af kolmunna, eða tæp 300.000 tonn, á meðan samdráttur varð í veiðum á síld, loðnu og makríl. Aflaverðmæti uppsjávarafla jókst um 2,6% miðað við fyrra ár og var 24,4 milljarðar króna árið 2018.

Af flatfiski veiddust rúmlega 27.000 tonn árið 2018 sem er 23,6% aukning frá fyrra ári. Aflaverðmæti flatfiskafurða jókst um 35,6% miðað við árið 2017.

Löndun á skelfisk og krabbadýrum var tæplega 12.500 tonn árið 2018 sem er magnaukning um 18,3% frá árinu áður. Verðmæti skel- og krabbaafla jókst um 7,2% miðað við 2017.