mánudagur, 23. september 2019
 
TölublöðVenjuleg útgáfa

Aflaverðmæti eykst um 19% milli ára

29. október 2010 kl. 09:18

Aflaverðmæti íslenskra skipa nam rúmum 79 milljörðum króna á fyrstu sjö mánuðum ársins 2010 samanborið við tæpa 67 milljarða á sama tímabili 2009. Aflaverðmæti hefur því aukist um 12,5 milljarða eða 18,8% á milli ára, að því er fram kemur í frétt frá Hagstofu Íslands.

Aflaverðmæti botnfisks var í lok júlí orðið 56,5 milljarðar og jókst um 20,9% frá sama tíma í fyrra þegar aflaverðmætið nam 46,7 milljörðum. Verðmæti þorskafla var um 27 milljarðar og jókst um 28,7% frá fyrra ári. Aflaverðmæti ýsu nam 9,5 milljörðum og jókst um 2%. Verðmæti karfaaflans nam 6,8 milljörðum, sem er 21,9% aukning frá árinu 2009. Verðmæti ufsaaflans jókst um 26,6% milli ára og nam rúmum 4,3 milljörðum á fyrstu sjö mánuðum ársins 2010.

Verðmæti flatfiskafla nam rúmum 6,3 milljörðum króna í janúar til júlí 2010, sem er 1,5% samdráttur frá fyrra ári. Aflaverðmæti uppsjávarafla jókst um 19,2% milli ára og nam tæpum 14,6 milljörðum.   Verðmæti afla sem seldur er í beinni sölu útgerða til vinnslu innanlands nam 32,7 milljörðum króna og jókst um 25,5% frá árinu 2009. Aflaverðmæti sjófrystingar voru rúmir 27 milljarðar, sem er 26% aukning milli ára. Verðmæti afla sem keyptur er á markaði til vinnslu innanlands jókst um 41% milli ára og var um 12 milljarðar.