sunnudagur, 25. ágúst 2019
 
TölublöðVenjuleg útgáfa

Áfram dauft yfir síldveiðum

30. nóvember 2016 kl. 13:28

Víkingur AK

Síldin er dreifð og magnið er lítið.

Dapurt ástand er á síldarmiðunum vestan við land þessa dagana. Reikna má með því að þeir, sem eiga óveiddan kolmunnakvóta, snúi sér frekar að kolmunnaveiðum í færeysku lögsögunni og hvíli síldina á meðan lítið finnst af síld í veiðanlegu magni.

,,Það er búið að vera tregt hjá okkur síðan við komum á miðin í fyrradag,“ segir Hjalti Einarsson skipstjóri á Víkingi AK í samtali á vef HB Granda en skipið var statt um 100 sjómílur vestur af Reykjanesi er rætt var við Hjalta.

Að sögn Hjalta virðist lítið vera af síld vestan við land.

,,Menn voru að kroppa eitthvað úr torfum sem þeir rákust á í gær en í dag hefur síldin dreift sér. Það sést eitthvað ryk á mælum eins og um átu sé að ræða og stundum kemur upp síld ef kastað er á þessar daufu lóðningar. Það er ómögulegt að segja til um hvaðan þessi síld er komin eða hvert hún er að fara. Til þess er síldin of dreifð eða magnið of lítið. Við erum komnir með um 180 tonna afla en hugmyndin var sú að ná í vænan skemmt fyrir vinnsluna á Vopnafirði og fara svo á kolmunnaveiðar. Venus NS fór á kolmunna eftir að hafa landað síld á Vopnafirði og mér skilst að það fáist ágætur afli nú í færeysku lögsögunni,“ segir Hjalti Einarsson.