miðvikudagur, 23. október 2019
 
TölublöðVenjuleg útgáfa

Afturkallar úrskurð vegna Saltvers

16. desember 2013 kl. 12:00

Þorskur í ís.

Fiskistofa endurgreiðir álagt gjald sem fyrirtækinu var gert að greiða.

Með úrskurði Fiskistofu hinn 19. júlí 2013 var lagt á Saltver ehf. í Reykjanesbæ sérstakt gjald vegna ólögmæts sjávarafla. Fiskistofa hefur nú afturkallað þennan úrskurð. 

Tildrög úrskurðarins voru þau, að þann 1. apríl 2011 hóf Fiskistofa rannsókn á magni aðfanga og afurða hjá Saltveri ehf. Þau gögn sem Fiskistofa aflaði vegna rannsóknarinnar voru talin benda til þess að unnið hefði verið úr óskráðum afla.

Saltver ehf. kærði umræddan úrskurð til úrskurðarnefndar. Eftir það tók Fiskistofa til sérstakrar skoðunar þær athugasemdir sem lögmaður Saltvers ehf. setti fram í kæru. Jafnframt hefur Fiskistofa tekið til skoðunar almennt verklag í málum sem þessum, þ.e. svokölluðum bakreikningsmálum.

Fiskistofa komst að þeirri niðurstöðu, með tilliti til athugasemda Saltvers ehf, og atvika máls að öðru leyti, að nýtingarprufa sem Fiskistofa gerði hjá Saltveri ehf gæfi ekki nægilega nákvæma mynd af meðalnýtingu hjá fyrirtækinu. Af þeim sökum ákvað Fiskistofa  að afturkalla úrskurð sinn um álagningu gjalds á Saltver ehf.

Fyrirtækinu var tilkynnt um þessi málalok með bréfi dagsettu 19. nóvember sl. og í framhaldi af því var áður álagt gjald endurgreitt.

Frá þessu er greint á vef Fiskistofu.  Þorsteinn Erlingsson framkvæmdastjór Saltvers er mjög ósáttur við aðgerðir Fiskistofu í þessu máli og gerir grein fyrir sínum sjónarmiðum í grein í Víkurfréttum sem má sjá HÉR.