laugardagur, 21. september 2019
 
TölublöðVenjuleg útgáfa

Aldrei séð annað eins

3. mars 2011 kl. 11:24

Þorskur, 8868

Óhemjumikið af þorski á stóru svæði við Grímsey

„Ég hef verið hérna í Grímsey síðan 1972 og ég hef aldrei séð annað eins,” segir Sigfús Jóhannesson útgerðarmaður í Grímsey á vef Landssambands smábátaeigenda. ,,Það var netabátur að landa um 15 tonnum og meðalvigtin var 12 kíló. Margir fiskar 20 kíló og þyngri.”

,,Það er óhemja af þorski á stóru svæði hér við Grímsey og litlu virðist skipta hvar trossurnar eru lagðar. Og stærðin er eitthvað sem við eigum ekki að venjast á þessum slóðum. Þá er hann svo feitur að hann er bókstaflega hnöttóttur af spiki,” segir Sigfús.  

Það er ekki bara mikið af þorski á svæðinu að mati Sigfúsar. Þorskurinn er feitur og lifrarmikill. Sigfús heldur áfram:

,,Þeir tóku mælingu á þessu hérna í fiskverkuninni, slægðu 20 tonn og bara lifrin var 1860 kíló eða 9,3%. Þorskurinn er fullur af loðnu og hún er full af hrognum. Það grátlegasta við þetta allt saman er að horfa upp á allan þennan fisk í dauðafæri og mega ekki snerta við honum. Á sama tíma fylgist maður með því að ráðamenn eru ekkert að gera í því að auka hið snarasta við aflaheimildir. Þeir telja tíma sínum greinilega betur varið í að þjarka um það hvort ekki eigi að taka aflaheimildirnar af mönnum til að geta leigt þeim þær til baka“, segir Sigfús Jóhannesson.