miðvikudagur, 21. ágúst 2019
 
TölublöðVenjuleg útgáfa

Annir á makrílvertíð

25. júlí 2019 kl. 14:00

Makrílvertíð er ávallt annatími hjá starfsmönnum frystigeymsla Síldarvinnslunnar í Neskaupstað.

„Makrílvertíð er ávallt annatími hjá starfsmönnum frystigeymsla Síldarvinnslunnar í Neskaupstað en makrílvinnsla hófst sl. laugardag,“ segir á vef Síldarvinnslunnar hf.

„Í frystigeymslunum er tekið á móti allri framleiðslu fiskiðjuvers fyrirtækisins og einnig landa skip sjófrystum afurðum beint í geymslurnar.“

Rætt er við Heimir Ásgeirsson, verkstjóra í frystigeymslunum, sem segir að fastir starfsmenn í frystigeymslunum séu fjórir talsins en síðan komi fleiri til starfa við upp- og útskipanir.

„Það fer mikið magn í gegnum frystigeymslurnar á makrílvertíðinni. Fyrstu fimm sólarhringa vertíðarinnar hefur verið samfelld vinnsla í fiskiðjuverinu og þá hefur Hákon EA landað einum farmi af sjófrystum makríl. Auðvitað höfum við nóg pláss því frystigeymslurnar rúma á bilinu 15 til 18 þúsund tonn. Mikið af makrílnum er flutt út í gámum en síðan koma einnig flutningaskip og lesta misjafnlega mikið magn. Eitt er víst að það verður nægum verkum að sinna á makrílvertíðinni sem nú er nýhafin,“ segir Heimir.

Ekkert lát er á makrílvinnslu í Neskaupstað. Í gær kom Bjarni Ólafsson AK til löndunar með um 500 tonn og í dag kom Margrét EA  með um 900 tonn. Skipin mættust á Norðfirði skömmu fyrir hádegi eins og meðfylgjandi mynd sýnir.