miðvikudagur, 13. nóvember 2019
 
TölublöðVenjuleg útgáfa

Arctic Fish opnar seiðaeldisstöð sína

18. október 2019 kl. 15:15

Valdimar Hermann Jóhannesson, nágranni seiðaeldisstöðvarinnar á Tálknafirði, klippir á borða ásamt ungmennum sem störfuðu á stöðinni í sumar. Við sitthvorn endann standa Sigurður Pétursson og Stein Ove Tveiten hjá Arctic Fish.

Skapa fimmtán ný störf í Tálknafirði. Stærsta einstaka fjárfesting í fiskeldi hér á landi.

Vestfirska fiskeldisfyrirtækið Arctic Fish opnaði í dag formlega seiðaeldisstöð í Tálknafirði. Um er að ræða stærstu einstöku fjárfestingu í fiskeldi hér á landi en þetta verður ein tæknivæddasta landeldisstöð í heimi sem byggir á vatnsendurnýtingarkerfi. Tilkoma seiðaeldisstöðvarinnar hefur skapað fimmtán heilsársstörf í Tálknafirði og yfir álagstíma við seiðaútsetningar er bætt við starfsmönnum en í sumar kom tugur starfsmanna til viðbótar.

Þetta kemur fram í tilkynningu frá fyrirtækinu. Þar segir ennfremur:

Landeldisstöðin er sú fyrsta hér á landi sem byggir að öllu leyti á vatnsendurnýtingartækni og gefur möguleika á framleiðslu stórra eldisseiða til útsetninga á nærliggjandi eldissvæðum fyrirtækisins. Byggingarnar, sem eru samanlagt yfir 10 þúsund fermetrar að stærð, eru þær stærstu sem risið hafa á Vestfjörðum. Með tilkomu þeirra býr Arctic Fish nú yfir fullkominni hita-, fóður- og ljósastýringartækni sem þýðir að nú er hægt að aðlaga eldisaðstæður að mismunandi árgangahópum.

Arctic Fish er nú þegar með sjóeldisstarfsemi í Tálknafirði, auk Patreksfjarðar og Dýrafjarðar, en Tálknafjörður var valinn fyrir landeldisstöðina þar sem þar er að finna náttúrulegar uppsprettur af heitu vatni. Landeldisstöðin er því bæði nálægt jarðvarmasvæði og sjó, þannig að útsetning seiða er möguleg beint úr stöðvarbyggingunum. Allir fimmtán starfsmenn landeldisstöðvarinnar eru búsettir í Tálknafirði og er fyrirtækið stærsti atvinnurekandinn í bæjarfélaginu. Eldisstöðin er byggð með möguleika á frekari stækkun þegar ný eldisleyfi fást.

Höfuðstöðvar Arctic Fish eru í Ísafjarðarbæ og nemur heildarfjöldi starfsmanna þess í land- og sjóeldi á Vestfjörðum á sjöunda tug.