fimmtudagur, 27. júní 2019
 
TölublöðVenjuleg útgáfa

Bjartsýni fyrir Barentshafstúr

3. júní 2019 kl. 15:37

Blængur í Norðfjarðarhöfn. Mynd/Smári Geirsson

Áhöfn Blængs má veiða um 1.200 tonn og þurfa að vera komnir til heimahafnar aftur 12. júlí. Áætlað er því að túrinn taki um 40 daga.

Unnið af krafti í morgun við að gera frystitogarann Blæng NK kláran til veiða í Barentshafinu. Bjartsýni ríkir um góðan túr enda aflabrögð góð.

Þetta kemur fram í frétt á heimasíðu Síldarvinnslunnar í Neskaupstað.

Í fréttinni segir að enn var beðið eftir pappírum frá Rússlandi sem verða að vera um borð. 

Heimasíðan ræddi við Bjarna Ólaf Hjálmarsson skipstjóra og spurði hvað gera mætti ráð fyrir að veiðiferðin yrði löng. 

„Það má gera ráð fyrir að þetta verði 40 daga túr en hafa verður í huga að það tekur fjóra og hálfan sólarhring að sigla á miðin og sama tíma tekur að sigla heim. Það má reikna með að upphaf ferðarinnar hjá okkur verði í skítabrælu. Við bíðum núna eftir rússnesku pappírunum en þeir verða að vera um borð í frumriti. Við megum fiska þarna um 1.200 tonn og þurfum að vera komnir til baka 12. júlí. Í fyrra tókum við 1.500 tonn í Barentshafinu í tveimur túrum en þá voru ekki sömu góðu aflabrögðin og hafa gjarnan verið áður. Hins vegar eru núna mun betri verð en fyrir ári. Best hefði verið að fara þarna fyrr en nú eru ein fimm íslensk skip á leiðinni í Barentshafið. Þessar Barentshafsveiðar leggjast vel í mannskapinn og samskiptin við Rússana eru okkur auðveld þar sem Geir Stefánsson stýrimaður er rússneskumælandi. Þegar við komum á staðinn kemur rússneskur eftirlitsmaður um borð sem verður með okkur allan tímann. Hann fylgist með veiðunum og hefur eftirlit með því að allt sé rétt gert og rétt vigtað. Allar tilkynningar berast á rússnesku, þar á meðal tilkynningar um heræfingar sem eru nokkuð algengar á svæðinu. Annars eru menn hinir hressustu og binda vonir við að Barentshafstúrinn verði hinn besti“, segir Bjarni Ólafur.