mánudagur, 13. júlí 2020
 
TölublöðVenjuleg útgáfa

Blængur í mokveiði í blíðuveðri

25. júní 2020 kl. 11:00

Blængur í Norðfjarðarhöfn. Mynd/Smári Geirsson

Aflabrögð hjá Blængi NK, skipi Síldarvinnslunnar, í Barentshafi eru með afbrigðum góð. Áætlað var að túrinn tæki 40 daga en ef áfram heldur sem horfir verður túrinn mun styttri, að sögn skipstjórans.

Frystitogarinn Blængur NK lagði af stað frá Neskaupstað til veiða í Barentshafinu hinn 8. júní sl. Skipið hóf síðan veiðar 12. júní og sló heimasíða Síldarvinnslunnar á þráðinn til Theodórs Haraldssonar skipstjóra til að fá fréttir af gangi þeirra.

„Það hefur gengið afar vel nánast allan tímann. Við hófum veiðarnar á Skolpenbanka og veiddum vel fyrstu tvo dagana en síðan dró heldur úr. Þá leituðum við austur eftir og höfum verið á Kildinbanka í góðri veiði síðan, en Kildinbanki er norðaustur af Múrmansk. Hér hafa um 20 skip verið að veiðum í rjómablíðu og það er ekki yfir nokkrum sköpuðum hlut að kvarta. Við erum nú búnir að fá 620 tonn upp úr sjó á 12 dögum og afköstin í vinnslunni hjá okkur hafa verið um og yfir 70 tonn á sólarhring sem er mjög gott. Aflinn hefur verið það mikill að við höfum miklu meira verið á reki en á veiðum. Vonandi heldur þetta áfram svona. Við gerðum ráð fyrir að túrinn tæki 40 daga en ef veiðin verður svipuð áfram verður hann mun styttri,“ segir Theodór.