laugardagur, 19. júní 2021
 
TölublöðVenjuleg útgáfa

Blikur á lofti í sjávarbyggðum

14. maí 2014 kl. 13:36

Frá Djúpavogi

Samtök sjávarútvegssveitarfélaga óttast áframhaldandi hagræðingaraðgerðir í sjávarútvegi.

Stjórn sjávarútvegssveitarfélaga tekur undir áhyggjur sveitarstjórna og íbúa þeirra sjávarbyggða sem horfa fram á flutninga á atvinnutækifærum og brottflutning fólks frá Djúpavogi, Húsavík og Þingeyri. Ekkert sveitarfélag komist í gegnum högg sem þetta án stuðnings frá hinu opinbera. 

„Samtökin óttast þær blikur sem nú eru á lofti vegna hagræðingaraðgerða Vísis, og minna á að sífelld samþjöppun í sjávarútvegi er afleiðing krafna um hagkvæmari rekstur og birtingarmynd þeirra aðstæðna sem greinin býr við. Því má ætla að þessar breytingar séu einungis hluti af þeim breytingum sem áfram má vænta,“ segir í ályktun stjórnar samtakanna.  

Samtök sjávarútvegssveitarfélaga gera þá skýru kröfu að fleiri leiða verði leitað en að gera sjávarútveginn ábyrgan fyrir byggðaþróun í landinu. Auknar varnir fyrir sjávarbyggðirnar og íbúa þeirra verði að byggja inn í lögin um stjórn fiskveiða, og færa sveitarstjórnum sjávarútvegssveitarfélaganna raunhæf tæki til að takast á við þær breytingar sem fylgja aukinni hagræðingarkröfu í sjávarútvegi og breytingu á löggjöf.