sunnudagur, 19. september 2021
 
TölublöðVenjuleg útgáfa

Börkur landar fyrsta makrílnum

25. júní 2021 kl. 11:35

Fyrsti makríllinn. Mynd frá Síldarvinnslunni

Fyrsti makrílfarmur vertíðarinnar var 320 tonn, fallegur fiskur en aflinn var örlítið síldarblandaður. Skipin hafa eins og í fyrra samstarf um löndun og kom þessi afli frá Berki, Beiti og Vilhelm Þorsteinssyni.

Börkur NK kom með fyrsta makrílfarm vertíðarinnar til Neskaupstaðar snemma í morgun, alls 320 tonn en örlítið síldarblandaður að sögn Síldarvinnslunnar sem greindi frá þessu rétt í þessu á vef sínum.

Í spjalli við tíðindamann fyrirtækisins sagði Hjörvar Hjálmarsson skipstjóri að vertíðin hafi farið hægt af stað:

„Fiskurinn er seint á ferðinni enda má segja að nú fyrst sé að vora almennilega í hafinu hér við landið. Hitastigið er komið í 9 gráður á Þórsbankanum núna en þar fékkst þessi fiskur.“

Þessi afli var veiddur af þremur skipum: Berki, Beiti og Vilhelm Þorsteinssyni, en Hjörvar segir að eins og fyrra muni „skipin sem landa makríl hjá Síldarvinnslunni hafa samstarf um veiðarnar en slíkt samstarf gekk vel í fyrra. Það er fiskur þarna en hann er mjög dreifður. Skipin voru gjarnan að fá um 40 tonn í holi. Fiskurinn er hins vegar fínn, stór og fallegur." 

Þegar Börkur fór í land héldu hin skipin austur í Smuguna: „Menn gera sér vonir um að þar sé meira að fá auk þess sem það verður skítaveður suður og suðaustur af landinu næstu daga. Við trúum því að makríllinn eigi eftir að skila sér inn í íslenska lögsögu. Það þýðir ekkert annað en að vera bjartsýnn. Við erum spenntir fyrir framhaldinu og munum fara út strax að löndun lokinni,“ segir Hjörvar.

Jón Gunnar Sigurjónsson, yfirverkstjóri í fiskiðjuveri Síldarvinnslunnar, segir að það sé afar gott að fá þennan makrílfarm til að prófa allan vélbúnað og sjá hvort allt virki ekki eins og það á að gera. „Við erum tilbúin í vertíðina og viljum bara fá meira,“ segir Jón Gunnar.