föstudagur, 18. júní 2021
 
TölublöðVenjuleg útgáfa

„Bræla“

8. júní 2015 kl. 12:05

Frá uppsetningu ljósmyndasýningarinnar Bræla. (Mynd af vef HB Granda).

Ljósmyndasýning Þrastar Njálssonar skipverja á Ásbirni RE í Sjóminjasafninu.

Um helgina var opnuð í Hornsílinu, sal Víkurinnar – Sjóminjasafns Reykjavíkur á Grandagarði, ljósmyndasýningin ,,Bræla“. Þar eru til sýnis 19 myndir sem Þröstur Njálsson, skipverji á Ásbirni RE, hefur tekið.

Að sögn Þrastar eru myndirnar teknar á sl. tveimur árum og allar eiga það sameiginlegt að lýsa lífinu um borð í Ásbirni. Bræla er undirtóninn eins og nafn sýningarinnar bendir til.

,,Myndirnar eru flestar svart-hvítar en sex þeirra eru í lit,“ segir Þröstur. 

Sýningin er haldin með stuðningi HB Granda.  „Það má segja að hér sjáum við sjómennskuna með augum sjómannsins,“ segir Brynjólfur Eyjólfsson, markaðsstjóri HB Granda sem opnaði sýninguna.

„Sjómenn vinna oft við erfiðar aðstæður og starf þeirra snýst um meira en að sækja fisk í sjó. Þeirra starf er fyrsti hlekkur í keðju við framleiðslu á gæðaafurðum sem neytendur víða um heim fá að njóta.“ 

Því má bæta við að á síðum Fiskifrétta hafa birst flottar myndir eftir Þröst.  

Ljósmyndasýningin ,,Bræla“ mun standa frá 6. júní til 20. september nk. 

Sjá nánar á vef HB Granda.