mánudagur, 23. september 2019
 
TölublöðVenjuleg útgáfa

Bras í fyrsta túr - og ekki mikið af fiski

10. september 2019 kl. 16:45

Helga María AK - nú RE 1. Mynd/Brim

Ísfisktogarinn Helga María AK er nú í sínum öðrum túr undir stjórn Friðleifs Einarssonar, sem áður var skipstjóri á Engey RE.

Ísfisktogarinn Helga María AK er nú í sínum öðrum túr undir stjórn Friðleifs Einarssonar, sem áður var skipstjóri á Engey RE. Helga María var í leiguverkefni á Grænlandi í sumar en að því loknu færðist áhöfn Engeyjar yfir á skipið en Engey var sem var seld til Rússlands í vor.

Heimasíða Brims ræddi við Friðleif.

„Þetta var langt sumarfrí en ég notaði það m.a. til að vera á strandveiðum. Það er þó gott að komast aftur á togveiðar og með mér er sá fasti kjarni manna sem voru með mér á Ásbirni RE og svo á Engey,“ segir Friðleifur.

Að sögn Leifs gekk fyrsti túrinn ekkert of vel.

„Aflinn var um 65 tonn, mest þorskur, og það var ýmislegt sem hafði áhrif á aflabrögðin. Fyrir það fyrsta þá var ekki mikið af fiski og sömuleiðis tekur það mann sinn tíma að læra á skipið. Þetta er hörkufínt skip en allt öðru vísi en Engey og Ásbjörn ef út í það er farið.“

Leifur segist hafa byrjað í kantinum vestan við Halann en síðan hafi hann unnið sig inn á Halamið.

„Stefnan er svo sett á Vestfjarðamið að nýju. Við stoppuðum ekki nema sólarhring í Reykjavík og mér sýnist ekki veita af tímanum, sérstaklega ef við þurfum að leita mikið að fisknum,“ segir Friðleifur.