mánudagur, 22. júlí 2019
 
TölublöðVenjuleg útgáfa

Breki og Páll Pálsson koma ekki heim fyrr en á nýju ári

15. nóvember 2017 kl. 12:28

Mynd/Skipasýn

Skipin hafa reynst vel í prófunum í Gulahafi.

Nú er ljóst að systurskipin Breki og Páll Pálsson koma ekki til landsins fyrr en á nýju ári - en ekki núna fyrir áramótin eins og að var stefnt. 

Um þetta er fjallað á heimasíðu Vinnslustöðvarinnar, eiganda Breka VE.

Þar segir að fulltrúar Samgöngustofu fóru til Kína og tóku skipin út eins og lög gera ráð fyrir og voru í kínversku skipasmíðastöðinni í um viku við úttekt á togurunum tveimur.

Fá og tiltölulega smá verk standa enn út af. Alveg í lokin verða skipin tekin í slipp á nýjan leik til að ljúka við að mála þau áður en þeim verður siglt heim á leið.

Magnús Ríkharðsson, skipstjóri á Breka VE, er nýkominn frá Kína og tók þátt í reynsluveiðum á báðum íslensku togurunum. Hann segir að þeir hafi reynst mjög vel: 

„Við sigldum um 30 mílur út á Gulahaf, mitt á milli Kína og Suður-Kóreu, og vorum þar bæði í góðviðri og í kalda sem Kínverjar kölluðu reyndar brælu. Þannig gátum við prófað veiðar við mismunandi veðurskilyrði á miðunum. Skipin drógu trollin vel og það kom ágætlega út þegar prófað var að beygja skipunum á meðan togað var.“

Fiskurinn sem upp kom var bæði kunnuglegur og framandi, að miklu leyti smár skötuselur. Það sem hins vegar var gjörsamlega framandi var heldur ógeðfelldur fnykur af trollinu þegar það var komið um borð. Skýringin á því er sú að sjórinn er í meira lagi súr og lykt af veiðarfærum eftir því!"