laugardagur, 31. október 2020
 
TölublöðVenjuleg útgáfa

Brúarfoss lagður af stað heim

15. október 2020 kl. 10:17

Systurskipið Dettifoss kom til landsins í sumar. MYND/Jón Steinar Sæmundsson

Áætlað er að heimsiglingin taki um 40 daga og að skipið komi í þjónustu Eimskips í seinni hluta nóvember.

Brúarfoss, sem er seinna skipið af tveimur sem Eimskip hefur haft í smíðum í Kína, er á heimleið. Karl Guðmundsson, skipstjóri á Brúarfossi hefur verið í Guangzhou í Kína, síðan í byrjun ágúst ásamt fjórum úr áhöfninni til að fylgja skipinu eftir á lokametrum í smíðinni og taka þátt í prufusiglingu. Ellefu menn til viðbótar úr áhöfninni komu svo til Kína fyrir um tveimur vikum síðan til að taka þátt í heimsiglingunni.

Þetta kemur fram í frétt fyrirtækisins.

Karl segir í fréttinni að það hafi verið mjög góða tilfinningu að stíga um borð í Brúarfossi í fyrsta sinn. Það kom Karli mest á óvart hversu stórt skipið er í raun og hagkvæmnin í stærðinni „Vélin eyðir minna pr. gámaeiningu en gömlu skipin og mengar minna sem er mikilvægt fyrir okkur,“ segir Karl. 

Prufusiglingu lauk þann 9. september en í henni er búnaður skipsins prófaður og tekinn út. Heilt yfir gekk siglingin vel og öll kerfi virkuðu vel. Nú er búið að fínstilla það sem útaf stóð og skipið klárt til heimsiglingar en áætlað er að hún taki um 40 daga og að skipið komi í þjónustu Eimskips í seinni hluta nóvember.

Brúarfoss og systurskipið Dettifoss eru stærstu gámaskip í sögu íslensks kaupskipaflota, 180 metra löng, 31 metra breið og geta borið 2150 gámaeiningar. Þau eru sérstaklega útbúin til að minnka losun köfnunarefnisoxíð (NOx) út í andrúmsloftið. Skipin verða mun sparneytnari á flutta gámaeiningu í samanburði við eldri skip og eru útbúin olíuhreinsibúnaði sem minnkar losun brennisteins (SOx) út í andrúmsloftið. Skipin eru sérlega útbúin fyrir siglingar á Norður Atlantshafi, ísklössuð og uppfylla Polar Code reglur sem eru nauðsynlegar til siglinga í kringum Grænland.