miðvikudagur, 25. nóvember 2020
 
TölublöðVenjuleg útgáfa

Brugðist við olíumengunarviðvörun

30. apríl 2020 kl. 13:44

TF SIF - vél Landhelgisgæslunnar. Mynd/LHG

Eftirlitsflugvélin TF-SIF var þegar í stað kölluð út. Mengunin var minni en óttast var í fyrstu en olíuslikja var þó sjáanleg.

Stjórnstöð Landhelgisgæslunnar barst rauð olíumengunarviðvörun með gervitunglamynd frá Siglingaöryggisstofnun Evrópu í gærmorgun. Samkvæmt myndinni var olíumengunin um 50 sjómílur suðvestur af Reykjanesi. 

Frá þessu segir í frétt frá Landhelgisgæslunni. 

Athugun Landhelgisgæslunnar leiddi í ljós að þrír togarar höfðu farið um svæðið á leið sinni til veiða á Reykjaneshrygg aðfaranótt miðvikudags. Eftirlitsflugvélin TF-SIF var þegar í stað kölluð út og Umhverfisstofnun gert viðvart. Áhöfn flugvélarinnar myndaði svæðið og athugaði hversu umfangsmikil mengunin væri.

Við skoðun kom í ljós að um mengunin var minni en óttast var í fyrstu en olíuslikja var þó sjáanleg. Áhöfnin á TF-SIF setti sig í samband við skipstjóra togaranna sem könnuðust ekki við að hafa misst olíu í sjóinn. 

Landhelgisgæslan gerði skipstjórunum ljóst að vel væri fylgst með lögsögunni úr lofti og á sjó. Mengunin var ekki lengur sjáanleg þegar flogið var yfir staðinn á bakaleiðinni.