sunnudagur, 19. september 2021
 
TölublöðVenjuleg útgáfa

Búast við tvö þúsund þátttakendum

2. júní 2021 kl. 10:55

Ráðstefnan North Atlantic Seafood Forum fer fram dagana 8.-10. júní næstkomandi. Sökum COVID er um netviðburð að ræða þetta árið, sem gefur tækifæri til að auka fjölda þátttakenda og lækka kostnað ráðstefnugesta.

Ráðstefnan North Atlantic Seafood Forum fer fram dagana 8.-10. júní næstkomandi. Alls verða fluttir yfir 160 fyrirlestrar í 18 málstofum, og er búist við yfir 2000 þátttakendum víðsvegar að úr heiminum og úr hinum ýmsu hlekkjum í virðiskeðju sjávarafurða.

Í mars ár hvert, síðastliðin 15 ár, hafa stjórnendur og hagaðilar í sjávarútvegi og fiskeldi flykkst til Bergen til að sitja ráðstefnu North Atlantic Seafood Forum (NASF). Markhópur þessarar þriggja daga ráðstefnu hefur jafnan verið stjórnendur í sjávarútvegi, fiskeldi og tengdum greinum þ.e. tækjaframleiðendur, markaðsfyrirtæki, bankar, tryggingafélög, ráðgjafafyrirtæki o.s.frv. Þrátt fyrir að kostnaður við þátttöku hafi verið umtalsverður hafa á milli 800 og 1.000 manns sótt viðburðinn ár hvert, sem sýnir hversu mikilvæg þessi ráðstefna er fyrir markhópinn. Sökum COVID hefur nú verið ákveðið að NASF21 verði netviðburður, sem gefur tækifæri til að auka fjölda þátttakenda og lækka ráðstefnugjaldið verulega.

Ef stiklað er á stóru yfir dagskrána, þá vekja eftirfarandi málstofur sérstaka athygli:

Áhrif laxalúsar á fiskeldi.

Fiskeldisfóður og þróun þess.

Framboð og eftirspurn í fiskeldi.

Nýjar framleiðsluaðferðir í fiskeldi.

Framboð og markaðir fyrir hvítfisk.

Konur í sjávarútvegi.

Framboð og eftirspurn í rækju.

Fjárfestingar í sjávarútvegi.

Framboð og markaðir uppsjávartegunda.

Umfjöllun um lykilmarkaði fyrir sjávarafurðir í umsjón Norwegian Seafood Council.

Sjálfbærni og sjávarafurðir.

Íslensk fyrirtæki og einstaklingar skipa nokkuð stóran sess í dagskránni. Þar er fyrst að nefna að Valka og Marel eru meðal helstu styrktaraðila ráðstefnunnar. Þá verða eftirtaldir Íslendingar eða aðilar tengdir Íslandi með á mælendaskrá:

Jón Birgir Gunnarson hjá Völku mun fjalla um flökun fyrir dauðastirðnun.

Guðbjörg Heiða Guðmundsdóttir hjá Marel mun fjalla um stafræna byltingu í virðiskeðju fiskeldis.

Bjorn Hembre hjá Arnarlax mun fjalla um laxeldi á Íslandi.

Sturlaugur Haraldsson hjá Norebo mun fjalla um framboð á hvítfiski frá Rússlandi.

Þór Sigfússon hjá Sjávarklasanum mun fjalla um nýtingu aukahráefna og velta upp spurningunni hvort 100% nýting sé möguleg.

Guðmundur Gíslason mun koma fram fyrir hönd Fiskeldis Austfjarða (Ice Fish Farm), Bjorn Hamre fyrir hönd Arnarlax (Icelandic Salmon) og Stein Ove Tveiten fyrir hönd Arctic Fish í málstofu fjárfesta.

Jóhannes Pálsson mun fjalla um áhrif Brexit á uppsjávargeirann.

Guðlaugur Þór Þórðarson mun fjalla um sjálfbærni í sjávarútvegi.

Allir fyrirlestrar verða aðgengilegir í a.m.k. mánuð eftir að ráðstefnunni lýkur og því er vel þess virði að skrá sig, þó svo að þátttakendur hafi ekki tækifæri til að sitja ráðstefnuna í „rauntíma“.

Þeir sem hafa áhuga á að fá frekari upplýsingar um NASF21 er bent á að þeir geta haft samband við Jónas R. Viðarsson - jonas@matis.is eða í síma 4225107.