sunnudagur, 19. september 2021
 
TölublöðVenjuleg útgáfa

Búið að bóka 80% sýningarrýmisins

2. júní 2021 kl. 14:30

Íslenska sjávarútvegssýningin snýr nú aftur í þrettánda skipti dagana 15.-17. september 2021.

Íslenska sjávarútvegssýningin Icefish er aðeins haldin á þriggja ára fresti og snýr nú aftur í þrettánda skipti dagana 15.-17. september 2021.

Þegar er búið að bóka 80% af sýningarrými Íslensku sjávarútvegssýningarinnar/IceFish og eru þó enn fjórir mánuðir þangað til ráðstefnan opni.

Aðstandendur sýningarinnar telja, í ljósi aðstæðna undanfarinna mánaða, að þátttakendum gefist langþráð tækifæri til þess að hittast augliti til auglitis á sama stað, eftir að hafa búið við sóttvarnarhömlur í meira en heilt ár. Bólusetning sé vel á veg komin, bæði í Evrópu og á heimsvísu, og væntanleg Covid-vegabréf gera það mögulegt að slakað verði á ferðalögum eftir sumarið.

Á seinustu sýningu, sem haldin var árið 2017, jókst fjöldi erlendra sýnenda um 41% og sú sveifla heldur áfram í ár, þar sem áberandi verða sýnendur frá Tyrklandi, Spáni, Frakklandi, Noregi, Færeyjum og Litháen. Á sýningunni í ár verða einnig í boði sýningarskálar frá Danmörku, Bretlandi og Kanada. Í fyrsta skipti í sögu sýningarinnar verður enn fremur spænskur sýningarskáli, þar sem fjöldi öflugra skipasmíðastöðva kynna það sem hæst ber hjá þeim.

„Á sýningunni 2021 kynnum við ýmsar nýjungar, þar á meðal sérstakt svæði fyrir fiskvinnslu/virðisaukningu/Fiskeldi og hliðarafurðir. Þetta er gert til þess að bæði endurspegla og  taka mið af þeirri þróun sem orðið hefur í greininni og stilla saman strengi með ráðstefnunni Fiskúrgangur skilar hagnaði (Fish Waste for Profit) sem haldin verður á öðrum og þriðja degi sjávarútvegsráðstefnunnar. Aftur verður boðið upp á tengslamiðlun í samstarfi við Nýsköpunarmiðstöð Íslands, þar sem kaupendur og seljendur eru leiddir saman á sýningunni, en með þessu er enn frekar stutt við bæði sýnendur og sýningargesti í því að ná saman. Árið 2017 skilaði þetta meira en 90 árangursríkum fundum með þátttakendum frá 24 löndum,“ segja aðstandendur.

Eftir að sýningunni var frestað frá 2020 til 2021 gáfu skipuleggjendur hennar út Icefish 365, skrá yfir sýnendur með mun ítarlegri sýningarskrá á netinu, gjaldfrjálsri, þar sem er að finna lýsingar, myndbönd, ljósmyndir, bæklinga og tengla á samfélagsmiðla, ásamt umfjöllun í vikulegu fréttariti 365 e-News sem berst yfir 14.000 viðtakendum. Þetta var gert í þeim tilgangi að tryggja sýnendum sýnileika og umfjöllun meðan ekki var unnt að hittast augliti til auglitis.

Til viðbótar er nú unnið að því að setja upp sýningu á netinu og samskiptavettvang sem gerir sýnendum í september kleift að ná til mun fleiri, langt út fyrir sýningarvettvanginn þar sem fólk hittist augliti til auglitis sýningardagana þrjá.

Marianne Rasmussen-Coulling, viðburðastjóri og skipuleggjandi hjá Mercator Media, segir að Íslenska sjávarútvegssýningin sé orðinn að ómissandi viðburður fyrir þau fyrirtæki sem stunda fiskveiðar, fiskeldi og fiskvinnslu, bæði á Íslandi og um heim allan.

„Þar sem fiskveiðar eru svo mikilvægar fyrir efnahag Íslands og 35% útflutningsverðmætisins kemur frá fiski eða fiskitengdum afurðum, þá mun Íslenska sjávarútvegssýningin bjóða upp á vettvang sem er einstakur í sinni röð í heimi sem tekur hröðum breytingum. Við hlökkum til þess að hitta viðskiptavini okkar,” segir Marianne.

Um IceFish 2021

Íslenska sjávarútvegssýningin og Menntasjóður Íslensku sjávarútvegssýningarinnar eru á vegum Mercator Media, og njóta stuðnings systurútgáfu þess, World Fishing & Aquaculture tímaritsins. Íslenska sjávarútvegssýningin 2021 fylgir í kjölfarið á tólf vel heppnuðum sjávarútvegssýningum, sem haldnar hafa verið á þriggja ára fresti síðan 1984.

Frekari upplýsingar um sýninguna, námsstyrkina og ráðstefnuna, má finna hér: www.icefish.is/ (á ensku og íslensku)