mánudagur, 30. nóvember 2020
 
TölublöðVenjuleg útgáfa

Draga má 0,6% þyngdar frá ofurkældum afla

8. apríl 2020 kl. 10:20

Ný íslensk aðferð við kælingu á fiski kallaði á breytingar.

Kristján Þór Júlíusson, sjávarútvegs- og landbúnaðarráðherra, hefur undirritað breytingu á reglugerð um vigtun og skráningu sjávarafla

Kristján Þór Júlíusson, sjávarútvegs- og landbúnaðarráðherra, hefur undirritað breytingu á reglugerð um vigtun og skráningu sjávarafla. Með breytingunni verður heimilt að draga 0,6% frá óunnum ofurkældum (íslausum) afla sem veginn er á hafnarvog.

Fiskur sem kældur er ofurkælingu fer íslaus í kar en hins vegar safnast saman vökvi úr fiskinum í karið. Fyrir liggur úttekt Fiskistofu á svokölluðu dripi í ofurkældum afla, en „drip mætti skilgreina sem þann aukaþunga er fiskurinn tekur til sín í formi vökva við þessa kæliaðferð. Niðurstaða úttektarinnar er að þetta drip sé á bilinu 0,4-1,1%. Með vísan til þessa er með þessari breytingu verið að heimila 0,6% frádrátt á hafnarvog frá brúttóvigtun á ofurkældum afla vegna þessa drips þannig að aflskráning sé rétt,“ segir í frétt frá stjórnarráðinu.

Þar er eftirfarandi haft eftir Kristján Þór: „Skipum sem búa yfir búnaði til að ofurkæla afla hefur fjölgað hratt undanfarið. Það hefur verið sérstaklega áhugavert að fylgjast með þeirri þróun enda um að ræða íslenskt hugvit og því enn ein staðfesting þess að íslensk þjónustu- og hátæknifyrirtæki eru í fararbroddi við að hámarka gæði aflans með nýjustu tækni. Það er mikilvægt að stjórnvöld fylgist með þessari þróun og liðki fyrir henni, m.a. með því að sjá til þess að regluverkið hvetji til slíkrar framþróunar. Það er meginmarkmið þeirra breytinga sem við erum hér að gera.“