miðvikudagur, 25. nóvember 2020
 
TölublöðVenjuleg útgáfa

Engin smit hjá áhöfnum kolmunnaskipanna

8. apríl 2020 kl. 17:45

Kolmunnaskipin í Norðfjarðarhöfn biðu niðurstöðu skimunar áhafnanna. Mynd/Smári Geirsson

Skipin lögð af stað á miðin við Færeyjar en þangað er 350 mílna sigling.

Kolmunnaskipin sem hafa legið í Norðfjarðarhöfn að undanförnu héldu til veiða í gær þegar niðurstöður skimunar áhafna þeirra fyrir Covid 19 lágu fyrir. Niðurstöðurnar voru neikvæðar í öllum tilvikum og því ekkert því til fyrirstöðu að láta úr höfn.

Frá þessu segir á heimasíðu Síldarvinnslunnar en skipin munu hefja veiðar á gráa svæðinu suður af Færeyjum. Þangað eru um 350 mílur frá Neskaupstað. Í dag höfðu engar fréttir borist um kolmunnaveiði á svæðinu.

Gullver NS landaði 104 tonnum af blönduðum afla á Seyðisfirði í gærmorgun. Gert er ráð fyrir að hann haldi á ný til veiða klukkan átta í kvöld og verði á miðunum yfir páskahátíðina.

Skip Bergs-Hugins í Vestmannaeyjum, Bergey VE og Vestmannaey VE, munu verða í landi yfir páskana. Bergey landaði í Eyjum í gærkvöldi og Vestmannaey er að landa í dag. Ráðgert er að bæði skipin haldi til veiða á annan í páskum.