mánudagur, 9. desember 2019
 
TölublöðVenjuleg útgáfa

Engu bætt við loðnukvótann

28. febrúar 2018 kl. 16:00

Uppsjávarveiðiskipið Huginn VE á loðnuveiðum. (Mynd: Ólafur Óskar Stefánsson).

Loðnumælingar í febrúar breyta ekki fyrri ráðgjöf.

Hafrannsóknastofnun telur ekki forsendur til að leggja til breytingar á fyrri ráðgjöf sinni um heildaraflamark loðnu á vertíðinni. Undanfarið hefur stofnunin verið við loðnumælingar fyrir Norðurlandi.

Í byrjun febrúar hafði Hafrannsóknastofnun lagt til að loðnukvótinn á vertíðinni 2017/2018 yrði 285 þúsund tonn eða 77 þúsund tonnum hærri en ráðgjöf stofnunarinnar frá því í október.

Í tilkynningu frá Hafrannsóknastofnun segir:

„Undanfarin ár hafa orðið breytingar á göngumynstri loðnunnar. Í febrúar 2017 fannst töluvert magn loðnu út af Norðurlandi sem leiddi til aukningar í aflamarki á þeirri vertíð. Sú loðna virtist hafa komið seint inn á hefðbundna gönguslóð og því hafa verið utan mælingasvæðis leiðangurs sem farinn var í janúar 2017. Því var ákveðið að halda að nýju til mælinga nú í febrúar.

Meginmarkmið leiðangursins sem lauk síðastliðinn föstudag var að fylgjast með göngum loðnunnar og að kanna hvort að nýjar loðnugöngur hefðu komið inn á svæðið fyrir norðan land eftir að mælingum í janúar lauk. Rannsóknaskipið Árni Friðriksson fór frá Reykjavík þann 12. febrúar og r/s. Bjarni Sæmundsson tók einnig þátt í mælingunni en hann var í árlegum leiðangri við mælingar á ástandi sjávar umhverfis landið.

Umtalsvert magn af loðnu fannst yfir grunnum út af Norðurlandi, m.a. á svæðum í kringum Grímsey, við Skjálfandadjúp og Öxarfjarðardjúp. Talsverður fjöldi norskra veiðiskipa var að loðnuveiðum á svæðinu, fyrst við Þistilfjarðardjúp og síðar í Öxarfirði og Skjálfanda og gáfu þau upplýsingar um dreifingu og göngur á svæðinu. Alls mældust rúm 200 þúsund tonn vestan línu sem dregin er norður úr Fonti á Langanesi, en í janúar sl. höfðu mælst rúm 300 þúsund tonn á því svæði. Magn og dreifing loðnunnar fyrir Norðurlandi ásamt aldurs- og stærðarsamsetningu hennar gefa ekki ákveðnar vísbendingar um að nýjar loðnugöngur hafi bæst við það sem áður var mælt.“