fimmtudagur, 27. júní 2019
 
TölublöðVenjuleg útgáfa

Erfitt að forðast þorskinn

27. maí 2019 kl. 16:16

Vestmannaey og Bergey einbeita sér að veiðum á öðrum tegundum en þorski.

Veiðin hjá Vestmannaey VE og Bergey VE hefur verið góð það sem af er mánuði. Skipin hafa fengið yfir 700 tonn en þau hafa lagt áherslu á að fiska annað en þorsk. 

Frá aflabrögðum segir á heimasíðu Síldarvinnslunnar. 

Skipin hafa veitt löngu, lýsu, steinbít og kola, en nú hafa þau hafið ýsuveiðar, segir í fréttinni. 

Þar segir einnig: 

Slegið var á þráðinn til Jóns Valgeirssonar skipstjóra á Bergey í morgun og spurt hvernig gengi að forðast þorskinn. „Það er bara erfitt. Það er svo mikið af þorski út um allt að hann truflar verulega þegar veiða á aðrar tegundir, en það þarf að sjálfsögðu að hugsa um fleira en þorsk. Við erum núna innarlega á Papagrunni að reyna við ýsu. Veiðin hefur gengið svona bærilega, en við komum ekki í neina ýsu fyrr en við vorum komnir austureftir. Áður lögðum við áherslu á steinbít og kola og þá var mest verið við Ingólfshöfðann. Lýsu höfum við fengið í fótreipi í Háfadýpinu, en mér finnst vera heldur minna af lýsu en verið hefur síðustu árin“, segir Jón.