miðvikudagur, 21. ágúst 2019
 
TölublöðVenjuleg útgáfa

ESB leyfir fosföt í saltfiski

21. nóvember 2013 kl. 14:40

Saltfiskvinnsla (Mynd/Fiskifréttir: GE

Hefur mikla þýðingu fyrir saltfiskframleiðendur

Evrópusambandið hefur fallist á óskir saltfiskframleiðenda um að nota fosföt við framleiðslu sína, að því er fram kom í hádegisfréttum RÚV. Fosfat fyrirbyggir að fiskurinn gulni og þráni, og tryggir þannig að hærra verð fáist fyrir hann.

Íslenskir saltfiskframleiðendur hafa um nokkurt skeið barist fyrir því að fá að nota fosföt í fiskinn. Þeim var gert að hætta notkun efnanna árið 2010 eftir að þeir urðu uppvísir að því að nota þau í óleyfi og án þess að tilgreina þau á umbúðum. Matvælastofnun hafði séð í gegnum fingur sér vegna óvissu um hvort fosföt væru aðeins tæknilegt hjálparefni við vinnsluna eða aukaefni sem neytandinn innbyrðir.

Vísindaráð ESB reyndist ósammála saltfiskframleiðendum og taldi fosföt aukaefni og því var notkun þeirra óheimil. Þau eru leyfð í ýmsan mat en lentu á sínum tíma ekki inni á lista yfir leyfileg aukaefni í saltfiski enda voru saltfiskframleiðendur þá ekki byrjaðir að nota efnin. Það tók langan tíma að fá fosföt inn á listann og á meðan óttuðust íslenskir satfiskframleiðendur að missa stöðu sína á mörkuðum.

Skjöldur Pálmason hjá Odda á Patreksfirði og  formaður íslenskra saltfiskframleiðenda segir í samtali við RÚV að þetta hafa mikla þýðingu. Á Spáni, Ítalíu og á Grikklandi vilji neytendur hafa saltfiskinn hvítann: „Það hefur verið talsvert mikið verðfall og eftirspurn eftir saltfiski hefur minnkað. Það er hinsvegarmjög erfitt aðselja hvort það er bein afleiðing af þessu eða einhverju öðru en við vonumst að með þessu getum við skaffað markaðnum þá vöru sem hún hefur óskað eftir hingað til".