laugardagur, 6. júní 2020
 
TölublöðVenjuleg útgáfa

Eyjarnar báðar með fullfermi eftir tæpa tvo sólarhringa

1. apríl 2020 kl. 16:14

Eyjarnar hlið við hlið í aðgerð austan við Ystaklett eftir mokfiskerí. Mynd/Guðmundur Alfreðsson

Mokveiði hjá Vestmannaey og Bergey stutt frá heimahöfn í Vestmannaeyjum.

Ísfisktogarar Bergs-Hugins, Vestmannaey VE og Bergey VE, komu báðir með fullfermi til Vestmannaeyja í gærkvöldi. Aflinn fékkst í kringum Eyjarnar og var blandaður; ufsi, þorskur og ýsa. Veiðiferðin hjá skipunum tók innan við tvo sólarhringa.

Frá þessu segir í frétt Síldarvinnslunnar þar sem rætt er við skipstjóra beggja skipanna.

Birgir Þór Sverrisson, skipstjóri á Vestmannaey, segir að mjög vel hafi gengið að fiska og um sé að ræða stóran og góðan vertíðarfisk.

„Það er fínasta stuð á mönnum en tíðin er dálítið rysjótt. Við förum venjulega út þegar lægir og förum síðan í land þegar brælir á ný. Það gekk vel að fiska hjá báðum skipum og í gær lágu þau hlið við hlið austan við Ystaklett í aðgerð áður en siglt var til hafnar,“ segir Birgir Þór.

Jón Valgeirsson, skipstjóri á Bergey, tekur undir með Birgi Þór og segir að fiskiríið sé býsna gott.

„Hér er mikið af þorski, töluvert af ufsa en það ber heldur minna á ýsunni. Meirihluti aflans hjá okkur fer til vinnslu innanlands en úr skipunum í gær fóru tveir gámar til útflutnings svo það er ekki allt lokað vegna veirunnar. Akkúrat núna er drullubræla en gert er ráð fyrir að bæði skip haldi til veiða í kvöld,“ segir Jón.