fimmtudagur, 27. júní 2019
 
TölublöðVenjuleg útgáfa

Eyjarnar hafa rótfiskað eftir sjómannadag

11. júní 2019 kl. 15:30

Bergey VE að veiðum. Vestmannaeyjar í baksýn. Mynd/Birgir Þór Sverrisson

Fylltu sig á skömmum tíma á Vestfjarðamiðum eftir sjómannadag.

Eftir sjómannadag héldu skip Bergs-Hugins, Vestmannaey VE og Bergey VE, til veiða á Vestfjarðamiðum. Skemmst er frá því að segja að gengið hefur afar vel á bæði skipin.

Frá þessu segir á heimasíðu Síldarvinnslunnar.

Þar segir að lögð var áhersla á að veiða þorsk og gekk það afar vel, en bæði skipin fylltu sig á skömmum tíma. Vestmannaey landaði síðan á Dalvík og Bergey á Grundarfirði.

Að löndun lokinni héldu skipin strax til veiða á ný. Nú voru það veiðar á ýsu og ufsa sem voru á dagskránni og reyndar verður lögð áhersla á veiðar á þeim tegundum það sem eftir lifir kvótaársins. Bergey veiddi fyrir vestan, fyllti sig og landaði í gær í Vestmannaeyjum. Vestmannaey hélt austur fyrir og mun væntanlega landa fullfermi í Eyjum á morgun.

Arnar Richardsson, rekstarstjóri Bergs-Hugins, segir í frétt Síldarvinnslunnar að þar á bæ séu menn afar ánægðir með aflabrögð skipanna og vonandi verði áframhald á góðri veiði í sumar.