mánudagur, 21. júní 2021
 
TölublöðVenjuleg útgáfa

Fær lögbann á eftirlíkingar frá Aldi

5. maí 2014 kl. 13:23

Varan umdeilda frá Aldi

Saucy Fish Company, sem er í eigu Icelandic Group, leitar til dómstóla.

Þýska stórmarkaðskeðjan Aldi hefur með lögbanni verið neydd til þess að fjarlægja fiskafurð sem nefnist “Saucy Salmon Fillet” úr hillunum verslana sinna meðan beðið er úrskurðar dómstóla um það hvort þar sé á ferð ólögleg eftirlíking á vörum The Saucy Fish Company, sem er í eigu Icelandic Group. 

Í þessu tilfelli er um að ræða pakkningar með ferskum laxabitum með sósu sem tilbúnir eru til eldunar. 

Vörurnar undir vörumerkinu Saucy Fish hafa slegið rækilega í gegn á undanförnum árum og náð ótrúlegum vinsældum. Magnús Bjarnason, forstjóri Icelandic Goup upplýsti síðastliðið haust á aðalfundi SF að salan á árinu 2013 stefndi í yfir 8 milljarðar íslenskra króna. Það er því mikið í húfi að varðveita vörumerkið svo aðrir nái ekki að nýta sér þá vinnu sem lögð hefur verið í að afla því vinsælda með ærnum tilkostnaði. 

Á sjávarútvegsvefnum Fis.com er haft eftir John Noble forstjóra British Brands Group, sem eru samtök sem standa vörð um vörumerki, að þetta sé í fyrsta skipti sem matvælafyrirtæki hafi fengið samþykkta lögbannsbeiðni í þessum kringumstæðum.