sunnudagur, 26. janúar 2020
 
TölublöðVenjuleg útgáfa

Fimm skip að hefja loðnuleit

15. janúar 2020 kl. 13:44

Hafrannsóknaskipið Árni Friðriksson við bryggju í Neskaupstað. MYND/Smári Geirsson

Birkir Bárðarson leiðangursstjóri vonast til þess að öll skipin láti úr höfn til mælinga og leitar í kvöld eða nótt.

Hafrannsóknaskipið Árni Friðriksson kom til Neskaupstaðar í morgun. Þar eru einnig í höfn grænlenska skipið Polar Amaroq og Hákon EA. Þessi þrjú skip munu ásamt Bjarna Ólafssyni AK og Ásgrími Halldórssyni SF taka þátt í loðnuleiðangri sem er að hefjast.

Síldarvinnslan hf. greinir frá þessu á heimasíðu sinni. Tíðindamaður Síldarvinnslunnar ræddi við Birki Bárðarsson leiðangursstjóra, sem sagðist vonast til að skipin öll létu úr höfn í kvöld eða nótt eftir að undirbúningsvinnu er lokið.

„Við þurfum að kvarða mæla í Árna Friðrikssyni og Hákoni  en mælar Polar Amaroq hafa þegar verið kvarðaðir. Í kvörðun mælanna felst að þeir séu stilltir þannig að þeir mæli allir eins. Bjarni Ólafsson og Ásgrímur Halldórsson koma með sem leitarskip en þau eru ekki með kvarðaða mæla. Það eru því fimm skip sem hefja mælingar og leit í kvöld eða nótt. Við gerum ráð fyrir að byrja út af Litladýpi og leita norður með landgrunnsbrúninni og einnig á landgrunninu. Saman munu skipin leita út af Austfjörðum og Norðausturlandi í fyrstu atrennu. Um borð í bæði Polar Amaroq og Hákoni verða þrír starfsmenn frá Hafrannsóknastofnun. Því miður er veðurútlit ekki sérstaklega gott en það er veðurgluggi næstu daga sem þarf að nýta vel. Því miður ríkir ekki mikil bjartsýni um loðnuvertíð en það er aldrei að vita. Loðnan hefur oft komið mönnum á óvart,“ er haft eftir Birki á vef Síldarvinnslunnar.