sunnudagur, 19. september 2021
 
TölublöðVenjuleg útgáfa

FISK Seafood kaupir 60% hlut í Steinunni hf.

7. september 2021 kl. 19:15

Mynd/Alfons

FISK Seafood greiðir ríflega 2,5 milljarða króna fyrir eignarhlut sinn í Steinunni hf. og eru viðskiptin gerð með fyrirvara um samþykki Samkeppniseftirlitsins.

Gengið hefur verið frá samkomulagi um kaup FISK Seafood ehf., í gegnum dótturfélag sitt, á 60% eignarhlut í útgerðarfélaginu Steinunni hf. í Ólafsvík.

Þetta kemur fram í tilkynningu á heimasíðu FISK Seafood.

Steinunn hf. hefur gert út vertíðarbátinn Steinunni SH-167 en fimm bræður og fjölskyldur þeirra hafa rekið félagið í u.þ.b. hálfa öld.

Í fréttinni segir að eftir kaupin munu tveir bræðranna, þeir Brynjar og Ægir Kristmundssynir, eiga ásamt fjölskyldum sínum sitt hvorn 20% eignarhlutinn í Steinunni hf. og halda áfram störfum sínum sem skipstjóri og vélstjóri Steinunnar SH-167. Aðrir eigendur selja hluti sína í félaginu. Engar breytingar eru fyrirhugaðar á starfsemi félagsins í Ólafsvík aðrar en þær sem lúta að frekari uppbyggingu og sóknarfærum, segir í fréttinni.

Í fréttinni kemur fram að markmið FISK Seafood með kaupunum er að styrkja umsvif sín í útgerð vertíðarbáta og nokkur skref hafi þegar verið stigin í þá átt á undanförnum misserum.

„Nálægð Snæfellsnessins við matarkistur Breiðafjarðar er afar heppileg til slíkrar starfsemi. Öflugur rekstur dótturfélags FISK Seafood, Soffaníasar Cecilssonar ehf. í Grundarfirði, gerir frekari uppbyggingu á þessum slóðum enn fýsilegri. Það er skoðun stjórnenda FISK Seafood að Snæfellsnesið sé í raun eitt atvinnusvæði og búi yfir miklum tækifærum til að styrkja stöðu sína á sviði fjölbreytts sjávarútvegs á komandi árum.“

Fram kemur að eftir meira en fimmtíu ára samfellda sjósókn þótti eigendum Steinunnar hf. kominn tími til þess að stokka upp spilin, sækja sér liðsstyrk og bæta vindi í seglin. Þegar tækifæri gafst til þess að snúa bökum saman með þeim framsæknu hugmyndum sem FISK Seafood hefur oft tjáð sig um þegar kemur að útgerð á Snæfellsnesi gengu viðræður hratt fyrir sig. Það er mikill metnaður af hálfu beggja aðila til þess að blása til frekari sóknar í útgerðinni frá Ólafsvík og efla um leið atvinnustarfsemi á Snæfellsnesinu öllu.

Frekari umfjöllun um kaup FISK Seafood má nálgast á vef fyrirtækisins.

Steinunn SH 167 er 153ja rúmlesta dragnótarbátur, smíðaður árið 1971 hjá Stálvík í Garðabæ. Fiskveiðikvóti félagsins er alls ríflega ellefu hundruð tonn í fimmtán tegundum, m.a. um 850 tonn í þorski auk ýsu, ufsa, skarkola o.fl.