mánudagur, 9. desember 2019
 
TölublöðVenjuleg útgáfa

Fiskur lagstur í loðnuát sem kemur niður á aflabrögðum

26. janúar 2018 kl. 13:35

Frystitogarinn Blængur NK. (Mynd: Hákon Ernuson)

Lítill friður fyrir brælum í fyrsta túr Blængs á árinu. Á flótta undan veðri og víða tregt.

Frystitogarinn Blængur NK er að landa í Neskaupstað í dag. Veiðiferðin tók 23 daga og er aflinn 388 tonn upp úr sjó að verðmæti um 97 milljónir króna. Togarinn millilandaði í Hafnarfirði 16. janúar.

Heimasíða Síldarvinnslunnar hitti Bjarna Ólaf Hjálmarsson skipstjóra að máli og spurði hvernig túrinn hefði gengið.

„Þetta var mikill brælutúr. Við fórum suður fyrir land og síðan á Vestfjarðarmið. Þar var verið í karfa og síðan millilandað í Hafnarfirði. Við þurftum síðan að flýja undan veðri á Austfjarðamið og þar var aflinn blandaður. Heilt yfir var frekar tregt í túrnum. Loðnan var að ganga upp að landinu og fiskurinn fer til móts við hana til að éta. Það mun rætast úr veiðinni hjá okkur þegar loðnan gengur upp á grunnin við Suðausturland,“ sagði Bjarni Ólafur í viðtalinu.