þriðjudagur, 22. júní 2021
 
TölublöðVenjuleg útgáfa

Flestir með sín mál í lagi

22. júní 2011 kl. 15:36

Sjómælingabáturinn Baldur (Mynd: Jón Páll Ásgeirsson).

Gæslan hefur farið um borð í rúmlega 100 báta en aðeins ein kæra gefin út.

Baldur, eftirlits- og sjómælingaskip Landhelgisgæslunnar hefur frá byrjun maí mánaðar farið til eftirlits um borð í rúmlega 100 báta á Íslandsmiðum. Gefin var út ein kæra og einnig smávægilegar athugasemdir gerðar, aðallega vegna lögskráningarmála sem hægt var að lagfæra með einföldum hætti.

Þetta er þriðja sumarið í röð sem Baldur hefur verið notaður til fiskveiðieftirlits í samvinnu við Fiskistofu.  Í áhöfn eru fjórir menn frá Landhelgisgæslunni auk tveggja eftirlitsmanna frá Fiskistofu.Við eftirlit og skyndiskoðanir er sérstaklega horft til veiða á lokuðum svæðum, ólöglegra veiðarfæra, brottkasts, haffæris, búnaðar og réttinda áhafna. Einnig eru skipsskjöl, búnaður, lögskráning, atvinnuréttindi yfirmanna, veiðarfæri og afli skoðaður.

Til samanburðar má nefna að á árinu 2010 fóru varðskip Landhelgisgæslunnar  til skyndiskoðana um borð í 325 skip og báta innan íslensku efnahagslögsögunnar. Voru þá athugasemdir  gerðar í 45,5% tilfella,  gerðar voru athugasemdir í 12% tilfella þegar afli var skoðaður en í u.þ.b. þriðjungi tilfella voru gerðar athugasemdir við búnað og réttindi um borð.