þriðjudagur, 24. september 2019
 
TölublöðVenjuleg útgáfa

Framleiðslumet í Neskaupstað

2. september 2019 kl. 11:00

Starfsfólk fiskiðjuvers Síldarvinnslunnar fékk tertu í viðurkenningarskyni. MYND/Síldarvinnslan

820 tonn af makríl fóru í gegnum fiskiðjuver Síldarvinnslunnar í Neskaupstað sólarhringinn 29. ágúst.

Sídlarvinnslan í Neskaupstað greinir frá því að framleiðslumet hafi verið slegið í makrílvinnslu í fiskiðjuveri fyrirtæksins þar hinn 29. ágúst síðastliðinn, þegar 820 tonn af makríl fóru í gegnum húsið.

Þennan metsólarhring voru unnin 370 tonn úr Berki NK og 450 tonn úr Beiti NK. Í tilefni dagsins fékk starfsfólk fiskiðjuversins dýrindis tertu til að gæða sér á.

Jón Gunnar Sigurjónsson yfirverkstjóri í fiskiðjuverinu var spurður hvort allt þyrfti ekki að ganga upp til þess að afköstin gætu orðið svona mikil.

„Jú, það má segja það. Það þarf allt að ganga fullkomlega upp. Allur vélbúnaður þarf að vera í toppstandi og engar bilanir að hrjá okkur, hráefnið þarf að vera fyrsta flokks og síðast en ekki síst frábær mannskapur. Við erum svo heppin að hafa frábært starfsfólk og skipin sem landa hjá okkur koma með hágæðahráefni að landi. Hjá okkur er unnið við framleiðsluna á þrískiptum vöktum og eru 25-26 á hverri vakt. Hluti starfsfólksins hefur ekki unnið svona störf áður en það hefur verið fljótt að aðlagast og náð frábærum árangri. Annars hefur makrílvertíðin gengið vel hjá okkur. Makríllinn hefur yfirleitt verið stór og fallegur og sannkallað úrvalshráefni. Um tíma varu farmarnir dálítið blandaðir hvað stærð varðar, en stóri fiskurinn er aftur orðinn ráðandi,“ segir Jón Gunnar í stuttu spjalli á vef Síldarvinnslunnar.