mánudagur, 10. ágúst 2020
 
TölublöðVenjuleg útgáfa

Góður bátur og gott ástand á miðunum

14. janúar 2016 kl. 09:00

Indriði Kristins BA.

Ný Cleopatra 40B afgreidd á Tálknafjörð

Útgerðarfélagið Bergdís ehf. á Tálknafirði fékk nú á dögunum afhentan nýjan Cleopatra beitningarvélabát frá Bátasmiðjunni Trefjum í Hafnarfirði. Að útgerðinni stendur Guðjón Indriðason. Synir Guðjóns, Indriði og Magnús Guðjónssynir, eru skipstjórar á bátnum. Ítarlega er fjallað um bátinn í nýjustu Fiskifréttum. 

Nýi báturinn hefur hlotið nafnið Indriði Kristins BA 751. Báturinn mælist 22 brúttótonn og er í krókaaflamarkskerfinu. Indriði Kristins er af nýrri gerð Cleopatra 40B sem er sérhönnuð inn í kerfi báta sem eru innan við 12 metrar að lengd. Báturinn mun leysa af hólmi eldri Cleopatra bát útgerðarinnar sem seldur var til Noregs. 

„Okkur líst vel á bátinn og hann hefur reynst vel. Við erum að landa núna 14 til 15 tonnum. Það er því ágætisástand á miðunum,“ sagði Guðjón Indriðason útgerðarmaður í samtali við Fiskifréttir er rætt var við hann fyrr í vikunni. 

Aðalvél Indriða Kristins BA er af gerðinni Doosan 4V 158TI 770 hö tengd ZF360IV gír. Rafstöð er frá Scam/Kubota 40kW. Siglingatæki eru af gerðinni JRC frá Sónar. Báturinn er einnig útbúinn með vökvadrifnum hliðarskrúfum að framan og aftan sem tengdar eru sjálfstýringu. Beitningavélarkerfi er frá Mustad með 18 þúsund krókum, línuspil er frá Beiti ehf. og annar búnaður til línuveiða frá Stálorku ehf. Ískrapavél og sjókælir frá Kælingu ehf. Öryggisbúnaður bátsins kemur frá Viking. 

Rými er fyrir 12 stk. 660 lítra kör, 4 stk. 460 lítra kör eða 29 stk. 460 lítra kör í lest. Í bátnum er innangeng upphituð stakkageymsla með aðstöðu fyrir 4 skipverja. Sæti er fyrir áhöfn í brú. Svefnpláss er fyrir 4 í tveimur aðskildum klefum. Salerni og sturtuaðstaða er í lúkar. Borðsalur er í lúkar ásamt fullbúinni eldunaraðstöðu með eldavél, örbylgjuofni og ísskáp.

Sjá nánar í nýjustu Fiskifréttum.