mánudagur, 23. september 2019
 
TölublöðVenjuleg útgáfa

Grímseyingar skora á ráðherra að draga til baka tillögur um lokanir veiðisvæða fyrir dragnót

21. maí 2010 kl. 08:56

Meirihluti kosningabærra íbúa í Grímsey hefur skrifað undir áskorun til sjávarútegsráðherra, þar sem skorað er á hann að draga til baka tillögur um lokun sjö fjarða á norðanverðu landinu fyrir dragnótaveiðum. Bent er á að þrír dragnótabátar séu gerðir út frá Grímsey og á þeim starfi 14-15 sjómenn. Frekari lokun veiðisvæða fyrir Norðurlandi komi því sérstaklega illa við útgerð þeirra.

Þetta kemur fram á vef LÍÚ. Í áskoruninni segir einnig að ekki verði séð að tillögur ráðherra byggist á vísindalegum rökum og er í því samhengi vísað til nýlegrar rannsóknar Hafrannsóknastofnunarinnar í Skagafirði. Í skýrslu stofnunarinnar segir: „Þær niðurstöður sem fengust í þessari rannsókn benda ekki til að dragnótin hafi áhrif á botndýralíf í Skagafirði."