miðvikudagur, 21. ágúst 2019
 
TölublöðVenjuleg útgáfa

Gullver landar fullfermi

30. júlí 2019 kl. 16:00

Gullver NS við bryggju á Seyðisfirði, framan við frystihúsið. MYND/Þorgeir Baldursson

Á Seyðisfirði er verið að landa úr ísfisktogaranum Gullver NS 102 tonnum af blönduðum afla: þorski, ýsu, ufsa og karfa.

Rúnar L. Gunnarsson, skipstjóri á ísfisktogaranum Gullver NS, er kominn til hafnar á Seyðisfirði þar sem í dag er verið að landa fullfermi. Afli skipsins er 102 tonn og er hann blandaður; þorskur, ýsa, ufsi og karfi.

Á vef Síldarvinnslunnar hf. er haft eftir honum að vel hafi gengið að fiska í veiðiferðinni.

„Það aflaðist ágætlega en túrinn var fjórir dagar höfn í höfn. Við vorum mest í Berufjarðarál, Lónsdýpi og á Papagrunni en enduðum á Herðablaðinu í þorski. Þetta er annar túrinn eftir að skipið kom úr slipp og það hefur bara gengið vel í þeim. Við getum varla kvartað,“ segir Rúnar.

Gert er ráð fyrir að Gullver haldi á ný til veiða annað kvöld.

Frystihúsið á Seyðisfirði hefur verið lokað að undanförnu vegna sumarleyfa starfsfólks en vinnsla mun hefjast þar á ný eftir verslunarmannahelgi. Vinnsluhléið hefur verið notað til að setja upp tvo nýja frystiskápa þannig að frystigeta hússins mun aukast verulega.