sunnudagur, 18. ágúst 2019
 
TölublöðVenjuleg útgáfa

Hafa tekið á móti 20.000 tonnum af makríl

1. október 2018 kl. 16:42

Norðfjarðarhöfn í morgun. Vilhelm Þorsteinsson EA heldur til veiða að lokinni löndun. Fjærst er Hákon EA að landa frystum makríl. Börkur NK er að landa síld til frystingar. Mynd/Smári Geirsson

Nóg hefur verið að gera hjá starfsmönnum frystigeymsla Síldarvinnslunnar í Neskaupstað að undanförnu.

Það hefur verið nóg að gera hjá starfsmönnum frystigeymsla Síldarvinnslunnar í Neskaupstað að undanförnu. Á makrílvertíðinni hafa frystigeymslurnar tekið á móti um 20.000 tonnum og kemur makríllinn frá fiskiðjuveri Síldarvinnslunnar og frystiskipunum Vilhelm Þorsteinssyni EA og Hákoni EA. Tekið hefur verið á móti um 4.500 tonnum frá Vilhelm og um 3.500 tonnum frá Hákoni. Þá hefur einnig verið unnin grálúða í fiskiðjuverinu og eins hefur gengið vel að frysta þar norsk-íslenska síld frá því að veiðar á henni hófust.

Frá þessu segir á heimasíðu Síldarvinnslunnar. 

 

Nú hefur Vilhelm Þorsteinsson hafið síldveiðar og landaði 580 tonnum af síldarflökum í gær en í dag er Hákon að landa rúmlega 500 tonnum af makríl.

 

Heimir Ásgeirsson, verkstjóri í frystigeymslunum, segir að miklar annir hafi verið hjá starfsmönnum frystigeymslanna síðustu mánuði.

„Við erum að senda frá okkur 500-600 tonn í gámum í hverri einustu viku en gámarnir fara í skip á Reyðarfirði. Þá koma flutningaskip nokkuð reglulega og lesta frystar afurðir. Það er til dæmis væntanlegt skip í þessari viku sem mun taka um 2.500 tonn af síld og makríl hjá okkur,“ segir Heimir.