þriðjudagur, 26. maí 2020
 
TölublöðVenjuleg útgáfa

Hafa tekið á móti 42.600 tonnum af kolmunna

5. maí 2020 kl. 11:00

Verksmiðjustjórar segja að um sé að ræða fínustu kolmunnavertíð það sem af er.

Það sem af er þessu ári hafa fiskimjölsverksmiðjur Síldarvinnslunnar í Neskaupstað og á Seyðisfirði tekið á móti um 42.600 tonnum af kolmunna.

Frá þessu er sagt á heimasíðu fyrirtækisins.

Verksmiðjan í Neskaupstað hefur tekið á móti rúmlega 27.000 tonnum og verksmiðjan á Seyðisfirði tæplega 15.600 tonnum. Síðustu daga hafa kolmunnaskipin komið til löndunar af miðunum suður af Færeyjum en þar hefur aflast þokkalega.

Hákon EA landaði 1.640 tonnum í verksmiðjuna í Neskaupstað 29. apríl, Börkur NK landaði 2.200 tonnum sl. laugardag og nú er Margrét EA að landa 2.100 tonnum. Bjarni Ólafsson AK kom til Seyðisfjarðar á laugardag með tæplega 1.700 tonn og í kjölfarið landaði Beitir NK rúmlega 3.000 tonnum.

Að sögn verksmiðjustjóranna, Hafþórs Eiríkssonar í Neskaupstað og Gunnars Sverrissonar á Seyðisfirði, gengur bæði löndun og vinnsla á kolmunnanum vel. Segja verksmiðjustjórarnir að um sé að ræða fínustu kolmunnavertíð það sem af er.